عمران خان کو رہا کریں، وہ جیل میں مر گئے تو پاکستان کی ساکھ پر سنگین داغ ہوگا
برطانیہ کے سابق وزیراعظم بورس جانسن نے پاکستان کے سابق وزیراعظم عمران خان کی فوری رہائی کا زوردار مطالبہ کرتے ہوئے کہا ہے کہ انہیں شدید خدشہ ہے کہ پاکستانی حکام عمران خان کو جیل میں ہی مرتا دیکھنا چاہتے ہیں۔ اگر ایسا ہوا تو یہ پاکستان کی ساکھ پر ایک سنگین داغ ثابت ہوگا۔
ڈیلی میل میں شائع ہونے والے اپنے تفصیلی مضمون اور اس کے ساتھ جاری کیے گئے ویڈیو پیغام میں بورس جانسن نے عمران خان کی قید کے حالات، ان کی صحت اور ان کے خلاف چلائے جانے والے مقدمات پر سخت تنقید کی ہے۔ انہوں نے لکھا کہ تہتر سالہ سابق وزیراعظم کو ایک چھوٹی، نم زدہ اور کیڑوں سے بھری کوٹھڑی میں رکھا گیا ہے جس کا سائز صرف چھ فٹ چوڑا اور آٹھ فٹ لمبا ہے۔ اس کوٹھڑی میں کھڑکی تک نہیں ہے اور بعض اوقات لائٹس بھی بند کر دی جاتی ہیں جس کے باعث انہیں کئی کئی دن اندھیرے میں گزارنا پڑتا ہے۔
بورس جانسن کے مطابق عمران خان کو قید تنہائی کا بار بار سامنا کرنا پڑتا ہے، کتابوں، اخبارات اور ملاقاتوں تک رسائی محدود ہے جبکہ مناسب ورزش کا موقع بھی نہیں ملتا۔ انہوں نے دعویٰ کیا کہ ناقص اور تاخیر سے کیے گئے طبی علاج کے بعد ان کی دائیں آنکھ کی پچاسی فیصد بینائی ختم ہو چکی ہے۔ تین سال سے زائد عرصے سے یہ حالات جاری ہیں اور انہیں شدید گرمی اور سردی کا سامنا بھی کرنا پڑا ہے۔
سابق برطانوی وزیراعظم نے عمران خان کے خلاف مقدمات کو سیاسی قرار دیتے ہوئے کہا کہ اصل وجہ کرپشن نہیں بلکہ ان کی غیر معمولی عوامی مقبولیت اور سیاسی طاقت ہے۔ ان کے بقول پاکستانی جرنیل عمران خان سے خوفزدہ ہیں کیونکہ انہیں اندیشہ ہے کہ رہائی کی صورت میں کروڑوں مداح انہیں دوبارہ اقتدار تک پہنچا سکتے ہیں۔
بورس جانسن نے عمران خان کے شاندار کرکٹ کیریئر اور انیس سو بیاسی کے ورلڈ کپ کی قیادت کا ذکر کرتے ہوئے انہیں دنیا کے عظیم ترین کرکٹ ہیروز میں شمار کیا۔ انہوں نے واضح کیا کہ وہ عمران خان کو ذاتی طور پر جانتے اور پسند کرتے ہیں تاہم کچھ سیاسی مؤقف پر ان سے اختلاف بھی رکھتے ہیں، خاص طور پر روس یوکرین جنگ، طالبان اور امریکہ سے متعلق خیالات پر۔
تاہم ان کا کہنا تھا کہ کسی بھی اختلاف کی بنیاد پر اس قسم کے سلوک کا کوئی جواز نہیں بنتا۔ انہوں نے لکھا کہ اگر کچھ مقدمات میں جواب طلبی بنتی بھی ہو تو بھی اس طرح کی ذہنی اور جسمانی اذیت انصاف کے اصولوں کے خلاف ہے۔ اپیلوں کی فوری اور آزاد عدالت میں سماعت ہونی چاہیے۔
بورس جانسن نے مضمون کے اختتام پر واضح الفاظ میں کہا: ”اس کوٹھڑی کا تالا کھولیں اور عمران خان کو آزاد کریں۔“
انہوں نے برطانیہ سے بھی اپیل کی کہ وہ اپنے سفارتی اثر و رسوخ کو استعمال کرتے ہوئے اس معاملے پر آواز اٹھائے۔ بورس جانسن کا یہ مضمون اور ویڈیو پیغام بین الاقوامی سطح پر عمران خان کی رہائی کے مطالبے کو نئی شدت بخش رہا ہے۔
کوئی تبصرے نہیں:
ایک تبصرہ شائع کریں