خیبر پختونخوا میں ایمرجنسی کا فیصلہ آسان نہیں تھا، محسن نقوی
وفاقی وزیر داخلہ محسن نقوی نے کہا ہے کہ خیبر پختونخوا کے حوالے سے آج جو فیصلہ کیا گیا وہ حکومت کے لیے بالکل آسان نہیں تھا۔ صوبائی حکومت کو اعتماد میں لینے اور دہشت گردی کے خلاف مشترکہ محاذ بنانے کی کوششیں ایک ماہ سے زیادہ عرصے تک جاری رہیں۔
اسلام آباد میں پریس کانفرنس کرتے ہوئے وزیر داخلہ نے واضح کیا کہ لانگ مارچ کے مطالبات پر عملدرآمد مارچ کے اعلان سے پہلے ہی شروع ہو چکا تھا۔ بانی پی ٹی آئی سے ملاقاتیں، طبی سہولیات اور دیگر معاملات طے شدہ طریقے سے آگے بڑھ رہے تھے۔ خود پارٹی کے کچھ رہنماؤں کو بھی یہ سمجھ نہیں آ رہا تھا کہ آخر لانگ مارچ کا اعلان کیوں ضروری سمجھا گیا۔
محسن نقوی نے بتایا کہ پی ٹی آئی قیادت کے ساتھ دو دن تک تفصیلی مذاکرات ہوئے۔ رات پونے بارہ بجے تک وہ خود رابطے میں رہے۔ اسد قیصر نے یقین دہانی کرائی تھی کہ دہشت گردی کے خلاف جنگ میں ایک قدم بھی پیچھے نہیں ہٹیں گے۔ مذاکراتی مسودے میں پارٹی کی خواہش پر پانچ چھ تبدیلیاں بھی شامل کی گئیں، لیکن بعد میں اچانک ایک بالکل مختلف مسودہ سامنے آ گیا۔
وزیر داخلہ نے کہا کہ سہیل آفریدی سے بھی متعدد ملاقاتیں ہوئیں۔ آخری کال میں انہیں رات پونے بارہ بجے بتایا گیا کہ اب بھی موقع موجود ہے کہ صورتحال کو بہتر بنایا جا سکے۔ چیزیں بہت آگے نکل چکی ہیں مگر صبح والا قدم کسی نہ کسی طرح مؤخر کیا جا سکتا ہے۔ افسوس کہ دوسری طرف سے کوئی مثبت جواب نہیں ملا۔ اس کے بعد حکومت کے پاس آئینی راستہ اپنانے کے سوا کوئی چارہ باقی نہیں رہا۔
محسن نقوی نے زور دے کر کہا کہ دہشت گردی کے خلاف جنگ قومی ترجیح ہے اور اس میں کوئی سمجھوتہ قبول نہیں کیا جا سکتا۔ صوبائی حکومت کو ساتھ لے کر چلنے کی تمام ممکنہ کوششیں کی گئیں لیکن جب کوئی مثبت پیش قدمی نظر نہیں آئی تو فیصلہ لینا پڑا۔
کوئی تبصرے نہیں:
ایک تبصرہ شائع کریں