اسلام آباد میں کوئی سڑک بند نہیں، کنٹینرز شہریوں کے تحفظ کیلئے رکھے ہیں، وزارت اطلاعات
وزارت اطلاعات و نشریات نے وفاقی دارالحکومت اسلام آباد کی سڑکوں کی بندش سے متعلق غیر ملکی نشریاتی ادارے الجزیرہ کی رپورٹنگ کو مکمل طور پر مسترد کر دیا ہے۔ وزارت نے اس رپورٹنگ کو غلط، یکطرفہ، گمراہ کن اور منفی تاثر پیدا کرنے کی کوشش قرار دیا ہے۔
وزارت کی جانب سے سوشل میڈیا پلیٹ فارم ایکس پر جاری کردہ بیان میں واضح کیا گیا ہے کہ اسلام آباد میں کوئی بھی سڑک بند نہیں کی گئی۔ شہریوں کی جان و مال کے تحفظ کو یقینی بنانے کے لیے اسلام آباد ہائی کورٹ کے احکامات کی روشنی میں صرف حساس مقامات پر عارضی طور پر کنٹینرز رکھے گئے ہیں۔
بیان میں مزید کہا گیا ہے کہ غیر ملکی نشریاتی ادارے نے ان حفاظتی اقدامات کو حقائق کے خلاف محض سڑکوں کی بندش کے طور پر پیش کیا اور زمینی حقائق کو یکسر نظرانداز کیا۔ حقیقت یہ ہے کہ تمام اہم سڑکیں ٹریفک کے لیے مکمل طور پر کھلی ہیں۔
وزارت کا موقف ہے کہ اس طرح کی یکطرفہ اور منفی رپورٹنگ حقائق کو تبدیل نہیں کر سکتی۔ تمام اقدامات عدالتی احکامات کے تناظر میں اٹھائے گئے ہیں اور شہریوں کے تحفظ کو اولین ترجیح دی گئی ہے۔
حکومت کا کہنا ہے کہ امن و امان کی صورتحال کو مدنظر رکھتے ہوئے احتیاطی تدابیر اختیار کرنا ضروری ہے تاکہ کسی بھی ناخوشگوار واقعے سے بچا جا سکے۔ شہریوں سے اپیل ہے کہ وہ سرکاری بیانات پر اعتماد کریں اور افواہوں سے گریز کریں۔
کوئی تبصرے نہیں:
ایک تبصرہ شائع کریں