سہیل آفریدی لانگ مارچ نہ لائے تو عدم اعتماد لے آئیں، عمران خان کے پیغام کا دعویٰ
راولپنڈی — اڈیالہ جیل میں نظر بند پاکستان تحریک انصاف کے بانی عمران خان نے خیبر پختونخوا کے وزیر اعلیٰ سہیل آفریدی کی کارکردگی پر شدید ناپسندیدگی کا اظہار کیا ہے۔ دستیاب اطلاعات کے مطابق انہوں نے اپنی بہن نورین نیازی کے ذریعے صوبائی حکومت میں تبدیلی اور عدم اعتماد کی تحریک لانے کا واضح پیغام بھیجا ہے۔
معتبر ذرائع کا کہنا ہے کہ جیل میں ملاقات کے دوران عمران خان نے نورین نیازی سے گفتگو کرتے ہوئے کہا کہ سہیل آفریدی نے ان کے لیے کوئی خاص کام نہیں کیا۔ انہوں نے یاد دلایا کہ اس سے قبل بھی وکیل کے ذریعے پیغام بھیجا گیا تھا کہ سہیل آفریدی وزارت اعلیٰ کا عہدہ چھوڑ دیں۔
نورین نیازی نے اس موقع پر بانی تحریک انصاف کو آگاہ کیا کہ سہیل آفریدی نے ستائیس ستمبر کو اسلام آباد لانگ مارچ کا اعلان کر رکھا ہے۔ ساتھ ہی انہوں نے بتایا کہ صوبائی اسمبلی میں سابق وزیر اعلیٰ علی امین گنڈاپور کا ایک گروپ موجود ہے جس کے تقریباً پینتیس اراکین سہیل آفریدی کے مخالف ہیں۔
اس معلومات پر عمران خان نے سخت موقف اپناتے ہوئے ہدایت دی کہ اگر سہیل آفریدی مقررہ تاریخ کو اسلام آباد مارچ نہیں لاتے تو فوری طور پر ان کے خلاف عدم اعتماد کی تحریک لائی جائے۔ انہوں نے یہ بھی کہا کہ علی امین گنڈاپور کو بھی یہی پیغام پہنچایا جائے کہ مارچ نہ لانے کی صورت میں کارروائی کی جائے۔
ذرائع کے مطابق جب یہ پیغام سہیل آفریدی تک پہنچا تو انہوں نے حالات کی نزاکت کو دیکھتے ہوئے مارچ اور احتجاج کے پروگرام میں اچانک تبدیلی کر دی۔ اس کے علاوہ خیبر پختونخوا کے وزیر اعلیٰ اس وقت وفاقی حکومت کے ایک اہم وفاقی وزیر کے ساتھ مسلسل رابطے میں ہیں اور دونوں کے درمیان مشترکہ حکمت عملی پر بات چیت جاری ہے۔
سیاسی حلقوں میں اس پیغام کو خیبر پختونخوا کی موجودہ سیاسی صورتحال کے حوالے سے اہم قرار دیا جا رہا ہے۔ مبصرین کا خیال ہے کہ عمران خان کی اس ہدایت کے بعد صوبائی قیادت پر دباؤ بڑھ گیا ہے اور آنے والے دنوں میں مزید سیاسی سرگرمیوں کا امکان ہے۔
کوئی تبصرے نہیں:
ایک تبصرہ شائع کریں