اگر عوام کے ساتھ کھڑا ہونا ناسمجھی ہے تو میں یہ ناسمجھی بار بار کروں گا، سہیل آفریدی
لانگ مارچ کے دوسرے دن کرک سے اہم خطاب
خیبر پختونخوا کے وزیر اعلیٰ محمد سہیل آفریدی نے کرک میں لانگ مارچ کے شرکاء سے خطاب کرتے ہوئے واضح کیا کہ وہ بانی پاکستان تحریک انصاف عمران خان کے اصولوں پر مضبوطی سے کاربند رہیں گے اور کسی بھی دباؤ کے سامنے سر نہیں جھکائیں گے۔ انہوں نے کہا کہ عمران خان اس وقت عوام کی حقیقی آزادی کے لیے جیل میں سختیاں برداشت کر رہے ہیں اور یہ جدوجہد آخری سانس تک جاری رہے گی۔
لانگ مارچ کے دوسرے دن کا آغاز کرتے ہوئے سہیل آفریدی نے اعلان کیا کہ قافلہ کوہاٹ کی جانب پیش قدمی کرے گا۔ انہوں نے ٹیلی ویژن پر بیٹھ کر انہیں ناسمجھ قرار دینے والے حلقوں پر سخت تنقید کرتے ہوئے کہا کہ اگر اپنی عوام کے ساتھ کھڑا ہونا ناسمجھی سمجھا جاتا ہے تو وہ یہ ناسمجھی بار بار اختیار کریں گے، اور اگر ملک سے محبت کو ناسمجھی کہا جائے تو ایسی نام نہاد سمجھداری پر لعنت ہے۔
سہیل آفریدی نے خبردار کیا کہ دہشت گردوں کو دوبارہ آباد کرنے کی غلط پالیسی خیبر پختونخوا کو ایک بار پھر تباہی کی طرف دھکیل سکتی ہے۔ آج حالات بگڑنے پر صوبائی حکومت پر ملٹری آپریشن کے لیے دباؤ بڑھایا جا رہا ہے۔ انہوں نے کہا کہ صوبے میں دہشت گردی مسلط کرنا ایک سوچا سمجھا منصوبہ ہے جس کے نتیجے میں خون بہے گا، لوگ بے گھر ہوں گے اور معاشی مراکز تباہ ہوں گے۔
لانگ مارچ کے شرکاء نے وزیر اعلیٰ کے خطاب پر زور دار نعرے لگائے اور عمران خان کی فوری رہائی کا مطالبہ دہرایا۔ سیاسی حلقوں میں سہیل آفریدی کا یہ موقف موجودہ حکومتی پالیسیوں اور اسٹیبلشمنٹ کے خلاف واضح چیلنج قرار دیا جا رہا ہے، جبکہ آنے والے دنوں میں لانگ مارچ کی پیش رفت پر قومی سطح پر نظر رکھی جا رہی ہے۔
کوئی تبصرے نہیں:
ایک تبصرہ شائع کریں