قازقستان میں بحری مشق کے دوران 14 فوجی ہلاک، غفلت پر 5 افسران گرفتار
قازقستان میں بحری تربیتی مشق کے دوران پیش آنے والے ایک المناک حادثے میں 14 فوجی اہلکار جان کی بازی ہار گئے ہیں۔ مشق میں شامل 17 اہلکار سمندر میں بہہ گئے تھے جن میں سے صرف تین کو محفوظ نکالا جا سکا۔
غیر ملکی میڈیا کے مطابق یہ حادثہ 24 ستمبر کو قازقستان کے مغربی علاقے منگستاؤ میں بحیرہ کیسپیئن کے ساحل پر پیش آیا۔ ابتدائی طور پر 12 اہلکار ہلاک قرار پائے تھے تاہم اگلے دن امدادی کارروائی کے دوران مزید دو لاشیں ملنے کے بعد ہلاکتوں کی تعداد 14 ہو گئی۔
حادثے کی اطلاع ملتے ہی فوری امدادی کارروائیاں شروع کر دی گئیں لیکن صرف تین اہلکاروں کو ہی بچایا جا سکا۔ باقی اہلکار سمندر کی تیز لہروں میں بہہ گئے اور بعد میں ان کی لاشیں برآمد ہوئیں۔
واقعے کے بعد قازقستان کی وزارت داخلہ نے وزارت دفاع سے وابستہ پانچ افسران کو حراست میں لے لیا ہے۔ گرفتار ہونے والوں میں بحریہ کے فرسٹ ڈپٹی کمانڈر بھی شامل ہیں۔ حکام کے مطابق ان افسران کے خلاف ممکنہ غفلت اور بحری جہاز رانی کے قوانین کی خلاف ورزی کے الزامات پر تحقیقات جاری ہیں۔
قازقستان کے صدر قاسم ژومارت توکایف نے اس المناک واقعے کا نوٹس لیتے ہوئے ایک حکومتی کمیشن تشکیل دینے کی ہدایت کی ہے۔ صدر نے متعلقہ اداروں کو حکم دیا ہے کہ حادثے کے تمام حالات و اسباب کا تفصیلی جائزہ لیا جائے اور تحقیقات مکمل ہونے تک تمام ضروری اقدامات یقینی بنائے جائیں۔
حکام نے واضح کیا ہے کہ حادثے کی حتمی وجوہات اور ذمہ داری کا تعین تحقیقات مکمل ہونے کے بعد کیا جائے گا۔ اس واقعے نے قازقستان میں بحری مشقوں کے دوران حفاظتی اقدامات پر بھی سوالات اٹھا دیے ہیں۔
بین الاقوامی سطح پر بھی اس حادثے پر تشویش کا اظہار کیا جا رہا ہے اور قازق حکام سے شفاف تحقیقات کی توقع کی جا رہی ہے۔
کوئی تبصرے نہیں:
ایک تبصرہ شائع کریں